FAKULTET HAQIDA MA’LUMOT

Fakultet maqsadi. Xorijiy filologiya fakulteti tilshunoslik, madaniyatlararo muloqot va amaliy tarjimashunoslik sohalarida ilg‘or tadqiqotlar hamda yuqori sifatli ta’limni integratsiya qilgan yetakchi akademik va ilmiy-innovatsion markazdir. Fakultetning asosiy maqsadi — yuqori kasbiy professionallikka ega malakali tilshunos-tadqiqotchilar, tarjimon va xorijiy til o‘qituvchilarini tayyorlashdan iborat. Fakultet tarkiban quyidagi 7 ta kafedradan iborat:

Rus va jaxon adabiyoti kafedrasi

Rus tilshunosligi kafedrasi

Tojik filologiyasi va sharq tillari kafedrasi

Ingliz tili va adabiyoti kafedrasi

Ingliz tili oʻqitish metodikasi kafedrasi

Roman-german tillari kafedrasi

Fakultetlararo chet tillari kafedrasi

Fakultet professor-o‘qituvchilarining umumiy soni 106 nafar bo‘lib, shundan:

- 5 nafar — Fan doktori (DSc);

- 39 nafar — Fan nomzodi va PhD;

- 23 nafar — Katta o‘qituvchilar;

- 37 nafar — O‘qituvchilar;

- Fakultet tyutorlarining umumiy soni 8 nafar

Fakultet tarixi. Fakultetning tashkil etilishi va ilk ilmiy-pedagogik poydevori 1970-yillarga borib taqaladi. Shu davrdan boshlab fakultetda mamlakatimizda filologiya va tilshunoslik sohasini rivojlantirishga salmoqli hissa qo‘shgan taniqli tilshunos va adabiyotshunos olimlar — K. Lansuzskiy, A. K. Imeryakov, O. M. Chumakova, professor V. A. Beloshapkova, professor A. M. Tixonov, dotsent I. P. Raspopov hamda dotsent N. A. Litvinova kabi yirik mutaxassislar faoliyat yuritganlar. Ular bilan birga fakultetda ilmiy-pedagogik kadrlarning birinchi avlodi sifatida ularning izdoshlari bo‘lmish yetakchi olimlarimiz — filologiya fanlari doktorlari, professorlar D. Qulmamatov, U. Esanov va Z.Narmuratov hamda filologiya fanlari nomzodlari va dotsentlar F. Arslonova, N. Tsukanova, B. Ilesov, N. Valiyeva, F. Togʻayev, M. Ashurov, S. Krivonos, E. S. Taybakova, R. A. Alimardanov, A. Ch. Choriyev, B. J. Jabborov, Yu. R. Rahmonov, shuningdek, tajribali o‘qituvchilar X. Suvonov, Sh. Kenjaboyev, Sh. Begasheva, kabi ko‘plab fidoyi va iste’dodli mutaxassislar samimiy mehnat qilganlar. Bugungi kunda ushbu boy akademik an’ana va ilmiy maktabni munosib davom ettirgan holda, ularning izdoshlari bo‘lmish yetakchi olimlarimiz — filologiya fanlari doktorlari, professorlar P. Bakirov, N.Panjiyeva, M.Qodirova, O‘.Xudaynazarova, D.Eshmuratova va boshqa ko‘plab tadqiqotchilar fakultetning ilmiy va pedagogik salohiyatini yangi bosqichga olib chiqmoqdalar. Hozirgi kunda fakultetda quyidagi ta’lim yo’nalishi va mutaxassisliklarda mutaxassislar tayyorlanmoqda.

Fakultetning xalqaro hamkorlik faoliyati. Xorijiy filologiya fakulteti ta’lim sifatini xalqaro standartlarga moslashtirish, ilg‘or xorijiy tajribalarni tatbiq etish hamda ilmiy-akademik mobillikni ta’minlash maqsadida xalqaro hamkorlik faoliyatini izchil rivojlantirib kelmoqda. Bugungi kunda fakultet Yevropa va Osiyoning yetakchi oliy ta’lim muassasalari hamda nufuzli xalqaro tashkilotlari bilan ikki tomonlama shartnoma va anglashuv memorandumlari (MoU) doirasida faol aloqalarni yo‘lga qo‘ygan. Xususan, Germaniyaning Leypzig universiteti, DAAD akademik almashtirish xizmati, Britaniya Kengashi (British Council) hamda Fransuz Aliansi (Alliance Française) kabi markazlar bilan hamkorlikda o‘qituvchilarning kasbiy mahoratini oshirish, zamonaviy til o‘qitish metodikalarini joriy etish va qo‘shma ilmiy-tadqiqot loyihalarini amalga oshirish bo‘yicha samarali ishlar olib borilmoqda. Fakultetning xalqaro ta’lim makoniga integratsiyalashuvida Erasmus+ (CBHE va Credit Mobility) hamda xalqaro grant dasturlari alohida o‘rin tutadi. Ushbu dasturlar doirasida har yili talabalar, magistrantlar va professor-o‘qituvchilar Yevropa OTMlarida bir semestrdan bir o‘quv yiligacha bo‘lgan muddatda akademik mobillik asosida tahsil olish va malaka oshirish imkoniyatiga ega bo‘lmoqdalar. Shuningdek, fakultetda 60230100 – Filologiya va tillarni o‘qitish (rus tili) yo‘nalishi bo‘yicha xorijiy hamkor universitet bilan birgalikda qo‘shma ta’lim dasturi (Joint Degree) muvaffaqiyatli amalga oshirilib, talabalarga ikkita diplom olish va xalqaro akademik muhitda tajriba orttirish sharoiti yaratilgan. Akademik muhitni baynalmilallashtirish maqsadida fakultetga har o‘quv yilida Buyuk Britaniya, Germaniya, Fransiya va Yaponiya kabi mamlakatitlardan xorijiy mutaxassislar hamda taklif etilgan professorlar (Visiting Professors) jalb etilib, ular talabalarga ma’ruzalar o‘qiydi va amaliy mashg‘ulotlar o‘tkazadi. Fakultet alohida infratuzilma bilan ham ta’minlangan bo‘lib, uning qoshida Nemis resurs markazi, sinxron tarjima va zamonaviy lingafon laboratoriyalari hamda xalqaro til sertifikatlari (IELTS, Goethe-Zertifikat, DALF)ga tayyorlash markazlari faoliyat yuritadi. Ushbu tizimli sa’y-harakatlar fakultetning xalqaro jozibadorligini va bitiruvchilarning global mehnat bozoridagi raqobatbardoshligini oshirishga xizmat qilmoqda.